Tralla-lalla-laaaa

Í dag söng ég fyrir gesti og gangandi í menningarhúsinu Hofi á Akureyri. En ég hafði sko heldur betur söngfélaga með mér. 

Þarna voru á ferð kirkjukórar, kvennakórar, karlakórar, blandaðir kórar og kórar eldri borgara, alls tuttuguogþrír kórar víðs vegar að af Norðurlandi. Ég syng með Kvennakór Akureyrar, KVAK, sem steig á svið númer tuttugu af þessum tuttuguogþremur kórum. Mín tilfinning er sú, að við höfum staðið okkur með sóma og við fengum líka ágætar undirtektir. Við höfum yfir að ráða sallafínum kórstjóra sem heitir Daníel Þorsteinsson og á hann heiður skilið fyrir sína vinnu með okkur, en hann tók við góðu búi af Jaan Alavera, sem tók við jafn góðu búi af Arnóri Vilbergssyni, sem tók við...............o.s.frv. Í dag syngja í kórnum okkar u.þ.b. sjötíu konur frá tvítugu til sjötugs og rúmlega það.

Eins og ég skrifaði, tókst þetta allvel og ég fór heim harla sátt. Fyrsti kór söng um kl. tíu og svo tók hver við af öðrum til kl. átján, en þá skelltu kórarnir sér allir saman á svið og sungu „Yfir voru ættarlandi" og gerðu það svo glæsilega að áheyrendur klöppuðu okkur upp. Það var gaman, enda endurtókum við lagið.

Góður dagur að baki og ég geng til náða með bros á vör. En fyrst verð ég að benda á að við erum að fara af stað með jólaundirbúning og munum syngja tvenna tónleika fyrir jólin, aðrir eru svona hefðbundnir jólatónleikar í okkar anda, með góðum liðsauka ef að líkum lætur, hinir eru árlegir styrktartónleikar til handa Mæðrastyrksnefnd á Akureyri.

Kór, kór, kór,  

Góðar stundir.

Athugasemdir

[Númi (IP-tala skráð) 24.10.2010 kl. 00:45]

Tókuð þið í kórnum,,,Máninn hátt á himni skín,,  en það gerir hann svo sannarlega núna,allavega í minni heimabyggð.

[Anna Dóra Gunnarsdóttir, 24.10.2010 kl. 00:47]

...sem er ?

[Númi (IP-tala skráð) 24.10.2010 kl. 10:14]

Við rætur móður höfuðborgarinnar,Esjunar.

[Anna Dóra Gunnarsdóttir, 24.10.2010 kl. 13:31]

Þar færðu vonandi að njóta tunglskinsins án ljósamengunar ? Ég bý ekki alveg svo vel, því að þó ég búi rétt utan við Akureyri, er ég vel upplýst, eiginlega of vel á góðu tunglskinskvöldi.

[Anna Dóra Gunnarsdóttir, 24.10.2010 kl. 13:32]

En nei, við sungum ekki um mánann.